بالی وڈ راؤنڈ اپ

حال ہی میں بالی وڈ کی معروف اداکارہ سے جب یہ پوچھا گیا کہ ان کے دیپکا پاڈوکون کے ساتھ کیسے روابط ہیں تو ان کا کہنا تھا کہ دیپکا کے ساتھ ان کا کوئی رابطہ ہی نہیں ہے۔ انھیں دیپکا سے کوئی سروکار نہیں ہے۔

در حقیقت ان دنوں دیپکا بالی وڈ کی ٹاپ ہیروئینز میں سے ایک ہیں۔ انھوں نے حال ہی میں اپنی کامیابی کی جشن منانے کے لیے پارٹی بھی دی تھی جس میں بالی وڈ کی معروف شخصیتیں شامل ہوئی تھیں۔گذشتہ سال دیپکا کی یکے بعد دیگرے تین فلمیں ریلیز ہوئیں اور تینوں کامیاب رہیں۔

جب قطرینہ سے دیپکا کی کامیابی کے بارے میں پوچھا گیا تو انھوں نے کہا: ’ایسا کچھ نہیں ہے۔ کبھی کرینہ کی بہت فلمز کامیاب ہو جاتی ہیں۔ پھر کبھی میری۔ اب اگر دیپکا کی آ رہی ہیں تو کیا ہوا۔ یہ سب تو چلتا ہی رہتا ہے۔ مجھے ان باتوں سے کوئی فرق نہیں پڑتا۔‘

بالی وڈ کے معروف اداکار سلمان خان ان دنوں اپنی آنے والی فلم ’جے ہو‘ کی پروموشن میں مصروف ہیں۔ جہاں گذشتہ دنوں وہ ڈانس ریئلٹی شو ’نچ بلیے‘ میں اپنی اس فلم کا پروموشن کرنے گئے تھے ، وہیں اس بار انہوں نے ’کامیڈی نائٹس ود کپل‘ کا انتخاب کیا ہے۔

کامیڈین کپل شرما کا یہ کامیڈی شو چھوٹے پردے پر ان دنوں بے حد مقبول شو تصور کیا جاتا ہے اور تقریباً تمام اداکار اس شو پر پروموشن کرنے ضرور جاتے ہیں۔ سلمان اس شو میں اپنی فلم کی ہیروئین ڈیزی شاہ اور فلم کے ڈائریکٹر سہیل خان کے ساتھ پہنچے۔

سلمان نے کامیڈی نائٹس کے سیٹ پر شو کے تمام فنکاروں کے ساتھ خوب مستی کی اور ڈانس بھی کیا۔ سلمان کی یہ فلم 24 جنوری کو ریلیز ہو رہی ہے جبکہ کامیڈی نائٹس کا سلمان خان والا شو 12 جنوری کو نشر کیا جائے گا۔

کمل ہاسن جیسے بڑے اداکار کی فلم میں اگر کوئی ہیروئن کام کرنے سے انکار کر دے تو یہ اپنے آپ میں حیرت کا مقام ہے۔

یہ بات اس وقت مزید دلچسپ ہو جاتی ہے جب یہ انکار ان کی اپنی بیٹی اور اداکارہ شروتی ہاسن نے کیا ہو۔

کمل ہاسن کی آنے والی فلم ’اتّم ویلن‘ میں شروتی نے کام کرنے سے مبینہ طور پر انکار کر دیا ہے کیونکہ ان کے پاس فلم کے لیے تاریخیں نہیں ہیں اور وہ انتہائی مصروف ہیں۔

اطلاعات کے مطابق اب کمل کسی دوسرے نئے چہرے کو اپنی فلم میں کاسٹ کرنے کے لیے پر تول رہے ہیں۔

فی الحال کمل ہاسن اس کی سکرپٹ پر کام کر رہے ہیں۔

ممبئی میں جمعرات کی رات فلم ڈیڑھ عشقیہ کا پریمیئر ہوا۔ اس میں بالی وڈ کے تمام لوگ اور فلم سے جڑے فنکار جیسے مادھوری دکشت، ہما قریشی اور ارشد وارثی یکجا تھے۔

حیران کن بات تو یہ تھی کہ فلم سے منسلک ایک اہم آرٹسٹ نصیر الدین شاہ پریمیئر پر موجود نہیں تھے۔

ویسے فلم کے پروموشن میں بھی نصیر زیادہ نظر نہیں آئے اور انہوں نے صاف طور پر کہا کہ پروموشن کرنا اور زیادہ میڈیا سے مخاطب ہونا ان کی فطرت میں شامل نہیں۔

فلم ڈیڑھ عشقیہ 10 جنوری کو ریلیز ہوئی ہے اور اطلاعات کے مطابق اچھا بزنس کر رہی ہے۔